[१]
उडदी चिड़ी गेई गलाई .......
उडदी चिड़ी गेई गलाई |
चुन्जा चोग चुगा कर भाई ||
जे उडने दा शौक
है तिज्जो |
रखेयां अपने फंग
फैलाई ||
हौसले रखेयां
दिले च अपने |
ताईं छुऊणा अम्बर
जाई ||
नजरां गडाई केई
बाज उड्डादे |
जीणा अपणा आप
बचाई ||
सरहदां ढाहणा सिख
पंछियाँ छा |
जीणा सच कर कंधाँ
ढाई||
दिखी –सुणी ने अंगणा बौणा |
लोक बैठे ने जाल
बिछाई ||
पथरां दे नी
माहणु बणदे |
उम्र गवा मत
चुरभुर लाई ||
मुठ दाणयां ने
रजणा सिखील लै |
छड करणी तू काली
कमाई ||
अपणा मानव धर्म
निभा कर |
मंदर –मस्जिद आई –जाई ||
[२]
पैहले भेइडू पाला मितरो
पैहले भेइडू पाला मितरो |
फिरी सुक्खो नुआला मितरो ||
निम्ब्ली पिच्छ प्रगड़े पिय्या |
थां-थां घालामाला मितरो ||
खोटेयां सिक्केयाँ नी साहूकारी |
इनां ई मत संभाला मितरो ||
दिक्खी-सुणी ने रस्ते हंडा |
खरा नी वक्त दा चाला मितरो ||
बुरे कम्मे दा बुरा नतीजा|
जद तक होवै टाला
मितरो ||
चंदरे दे पन्द्रह भोले दे सोलह |
मने दी मैल गुआला मितरो ||
जेब दिक्खी ने यारी पुगदी|
हसदे कडी दुआला मितरो ||
घुप्प न्याहरा बिखड़ा रस्ता |
कोई तां दीया बाला मितरो ||
जेकर तुसां बी गड्डणऐ झंडे |
कालियां भेडां ताला मितरो ||
घर उजाडू इनां नशेयाँ ई |
दीयो देशनिकाला मितरो ||
धीयां-भैणां दा
मान बचाओ |
कुडियां
चौंड-ज्वाला मितरो ||
[३]
मेरी सौगी –सौगी चल [हिमाचली गीत ]
मेरी सौगी –सौगी चल थोड़ा दिया रस्ता |
मैं बी मुइये जी लियां हसदा-हसदा ||
खिजी गेया अड़ीये मैं किल्ला –किल्ला चलदा |
कंडेयां दे रस्ते ते धुप्पा बिच्च जलदा ||
थोड़ी दूर सौगी चल चुक मेरा बस्ता.......||मैं ......
दुनिया पराई इथे मैहरम नी मिलिया |
अपणा बणाई लोकाँ जख्मा जो छिल्लेया ||
दर्द नमाणा मुइये दिले हाल दसदा ..||मैं ....
दिले बिच्च प्यार आला गीत ताँ बसाई जा |
चार ई दिहाड़े भवें प्रीत ताँ निभाई जा ||
मेरा बी संसार मुइये होई जाये बसदा .......||मैं .....
अशोक दर्द
[४]
चलेया कुतांह हुण
....
कट्टी दिन शबाबे
दे |
चलया कुतांह हुण
बाबे दे ||
जेकर औणा साह्डे
गराएं |
पोथू ल्यायाँ
हिसाबे दे ||
अबे नी ठगी सकदा
तू |
असी वाकम तेरे
नकाबे दे ||
अबे नी डरदा कोई
मितरा |
मुक्के दिन नबाबे
दे ||
जख्म अजेह बी
रिसदे ने |
ठगे तेरे ख्वाबे
दे ||
अबे पछताई किच्छ
नी मिलणा |
सप्प आया मुहें
कुआबे दे ||
कुर्सी खिसकी पेय
भुइयां |
मुक्के टोहर जनाबे
दे ||
[५]
लोक
राइयां दा पहाड़ बणान्दे लोक |
अट्टे दीयां चिड़ियाँ उडान्दे लोक ||
रिडकदयां दे दिखण तमासे |
बणीयां बत्तां ढाह्न्दे लोक ||
अप्पू चलदे नेहर- मनेहरे |
कसम मुसाहरे दी खांदे लोक ||
नगेयाँ पैरां चलदे दिखी |
कंडे बत्तां राह्न्दे लोक ||
बिना मतलब नी मुहें लाँदे |
आंदे लोक जांदे लोक ||
उच्चे उड़दे दिखी जलदे |
केई जाल बिछांदे लोक ||
इक्की हत्थे पाणी दिंदे |
दुए लाम्बू लाँदे लोक ||
तरदेयां कन्ने मारन तारी |
दुबदयां इ धक्का लांदे लोक ||
मिट्ठा मुंह नी दिखी भुल्लो |
खरा कदी नी चाहन्दे लोक ||
ढेंह्नदे टपरू दिखी दर्दा |
केई गीत बणान्दे लोक ||
[६]
याद रिया [गीत ]
चोरी – चोरी चोर निगाह
ने तकणा याद रिया |
इक फोटो गी बिच्च बटुए दे रखणा याद रिया ||
जद – जद चलियां चर्चां
तेरे- मेरे प्यार दीयां |
बिच्च महफिलां झूठा- सच्चा बकणा याद रिया ||
कोई उघाड़ी दिखी लै नी रिसदेयाँ जख्माँ गी |
इस तांई बस झूठे हास्से हसणा याद रिया ||
इश्क दी घाटी दे बिच्च खणयां दर्द दे खूहाँ गी |
हास्सेयाँ – ठठेयां दे ढकणा ने ढकणा याद रिया ||
किलमकिल्ले नेहरम्नेहरे प्रीत दे रस्ते दी |
वफ़ा चढ़ाईयां चढ़दे – चढ़दे थकणा याद रिया ||
प्यार भरोये खताँ दे अन्दर अणमुल्ले सरमाये गी |
बिच्च दिले दे साम्बी – साम्बी रखणा याद रिया ||
इक परदेसी साड़े बी कदी फेरी लांदा था |
गल्ल सुणान्दे दर्दे दिल दा झकणा याद रिया ||
[७]
मत लिक्ख दरबारां दा कमाल मितरा |
नित लिक्ख तू गरीबुआं दा हाल
मितरा ||
आज्ज तक बी नी जेहड़े होए हल मितरा |
लिक्ख गिणी – गिणी सारे ओ सुआल मितरा ||
रैह दी कितणी जमीन अणबाई लिक्खेयां |
कितने करी छड़े मौसमां कंगाल मितरा ||
बिना लाज्जे ते दवाइयां दे लिक्ख मरदे |
लिक्ख होए दे बुमार अस्पताल मितरा ||
पंजां सालां च ओ कितणीयां बारी आये थे |
वोटां टैमें जेहड़े पुच्छादे ने हाल
मितरा ||
माल खाई – खाई कितने क पेट बधि गे |
होए कितने क लिक्ख मालामाल मितरा ||
फंग पंच्छियाँ दे कितने क तोड़ी सुट्टी
ते |
लिक्ख बिच्छे दे ने कितने क जाल मितरा
||
पाणा चैचदा था दाली बिच्च लूण मितरा |
लिक्ख लूणए बिच्च पाई इन्हां दाल मितरा
||
लूण लाई – लाई कितणीयां भेडां खाई गे |
जेहड़े बणए दे थे भेडां दे पुहाल मितरा
||
बोझ बस्तेयाँ च डिग्रीयां दा चुक्की- चुक्की ने
|
युवा चढ़ादे ने कितने कुआल मितरा ||
भ्रष्टाचार दीया मैला आज्ज सब डोब्बेया
|
लेई कलम तू मैल गुआल मितरा ||
[८]
महंगाई लगी डराणा मितरा |
महंगाई लगी डराणा मितरा |
कुसने दुखड़ा लाणा मितरा ||
कपड़ा-लत्ता फीसां बधियां |
मुन्नू कियां पढ़ाणा मितरा ||
तेले दे भा रोज बधा दे |
कुसदे कियां जाणा मितरा ||
लाड़ी गलान्दी बिना प्याजे |
कियां तुड़का लाणा मितरा ||
खाली कनस्तर किचने अन्दर |
लग्गे मुहँ बिचकाणा मितरा ||
लूण-तेल सब होया महंगा |
डन्ग कियां टपाणा मितरा ||
जित्थे बी मरदा गरीबू मरदा |
मुश्किल जीणा-जियाणा मितरा ||
जिस दे खाते बिच्च विदेशां |
ओ कुनी जरकाणा मितरा ||
दर्द गलान्दा खाली झोले |
घरे इ कियां जाणा मितरा ||
[९]
सच्चियां गल्लाँ
बदकारां ने नी लाणी यारी |
चीज नी लैणी कदी उधारी ||
तन्गे संगे दिन कट्टी लैणए |
कर्जा नी खाणा कदी सरकारी ||
मोटरां च चलदे लोकां इ दिख्खी |
पैदल चलने च संग नी करणी |
लोकां दीयां जनानियां खातर |
अपणी लाड़ी तंग नी करणी ||
लोकां दीयां कोठियां दिखी |
अपने टपरुए आग्ग नी लाणी ||
लोकां दीयां रजाइयां दिख्खी |
अपणी खिंद नी कदी गुआणी ||
खोट्टा पैसा कदी नी चलदा |
बार – बार नी एह ठणकाणा ||
जित्थे आदर मान नी मिल्लै |
बार बार नी उत्थे जाणा ||
पागल बूढ़े डून्डे रोहले |
कोढ़ी कलंकी गरीब नमाणा ||
होई सकै ताँ सेवा करणी |
इन्हां दा नी कदी मखौल उडाणा ||
गल्ल करणी ताँ सच्ची करणी |
इयां नी कुसे इ लारे लाणा ||
झूठ ताँ चार दिहाड़े जींदा |
झूठ गलाई नी मान गुआणा ||
पी सराबां माह्णु , माह्णु नी रैहन्दा |
सराबिये ने कदी मुहँ नी लाणा ||
साह्म्ने सराबी आंदा दिख्खी |
होई सकै ताँ राह छडी दैणा ||
दर्द पीणी ताँ लगी इ जन्दी |
मैह्फिलां बिच्च नी पीणा खाणा |
जिन्हां गलियां च दुस्मण बसदे |
बेल्ला सबेल्ला नी
उस पास्से जाणा ||
अशोक दर्द
[१०]
चम्बे री घाटी
बड़ी सौह्णी चम्बे री घाटी मेरे मितरा,ठंडे – ठंडे नाडू ते डुग्गे डुग्गे नालु ओ |
नालां – खोलां ,फाटा घाहलां गीत मिट्ठे गूंजदे
बांसुरी बजांदे गुआलु ओ ||
द्रम्मण –हटलियां शुरू चम्बा हुंदा मुकदा लंगेरे
रीया धारा ओ |
इक्क पास्से पीर पंजाले प कैलास दुआ धौलाधारा रा नजारा ओ ||
डलहौजी अपणी चम्बे रा दिलडू संसारा मंझ जेह्डी मशहूर ओ |
झिकडे मैदाना जदु अग्ग बरदी आंदे लोक डलहौजी जरूर ओ ||
संघणी किहारा सेबा
रे बगीचे कन्ने तीसे छतराडी भरमौरा ओ |
चम्बे री धरती
शिवजी री धरती इत्थे बसे शिवजी ते गौरा ओ ||
भट्टिया रे हार
छैल पधरे मैदाना इसरी शान निराली ओ |
कुंजर महादेव
कन्ने बिणतरु नाग भट्टिया री बैट्ठे रखवाली ओ ||
पांगिये री घाटिया
चंद्रभागा बगदी चम्बे रिया रावी बगदी ओ |
टेढ़ी मेढ़ी चलदी
नखरे करदी जियां नौईं लाड़ी लगदी ओ ||
साहो-छतराड़ी-भरमौर-बैरागढ़
जातरा रा सुन्दर नजारा ओ |
समलेऊ-भंजराड़ू-सुरगाणी कन्ने खिरड़ी लगदियाँ छिन्जा धारा-धारा ओ ||
मिन्नी स्विट्जरलैंड चम्बे बिच्च लोको, नां जिसदा खजियारा ओ |
घने-घने बण खज्जी नाग मंदर, कन्ने छैल झीला रा नजारा ओ ||
चम्बे शहरा बसदा लच्छमी नरैण, भलेई बसै माता भद्रकाली ओ |
पांगिये री घाटिया बसै माता मिंधला, लोकां री करै रखवाली ओ ||
मैहले ता माता हिडिम्बा बसदी, बसै भरमौर ब्रम्हाणी ओ |
कल्न्द्रे बणागेई बन्नी माता बेलजा, डैणकुंड बसै पौहलाणी ओ ||
बैरा-स्यूल डैम सुरगाणी, चौहड़े पुल डैम चमेरा ओ |
दूर परदेसां तक बिजली पुजान्दे, करदे दूर ह्नेरा ओ ||
नाह्,णी, धूप, कौड़-पतीस, नागछतरी ते चमकणू, चम्बे रीयां उच्चियां धारा ओ |
ट्रकां रे ट्रक भरी-भरी जांदे, बिकदे पंजाबा रे बाजारा ओ ||
कुंजु चैन्चलो रे गीत, सुन्नी-भुन्कुए री प्रीत चम्बे री शान बधांदे ओ |
चम्बे री संस्कृति जग च निराली, दिक्खने जो जग वाले आंदे ओ ||
चम्बे रे चौगाने मिंजरा रे मेले गीतां विच्च रावी हसदी ओ |
दूर परदेसां भवें जाई बसीगे, दिलां विच्च धरती एह बसदी ओ ||
चम्बा म्हारा धुड़ूए री धरती, बसेया रा उच्ची-उच्ची धारा ओ |
धुड़ूए री धरती री
शान निराली ए, दर्दे जो जानी ते प्यारा ओ ||
अशोक दर्द
[११]
जे तुसी साहड़े फेरा पांदे....
जे तुसी साह्डे फेरा पांदे |
इस् दिलडू रा हाल सुणान्दे ||
साहड़े अंगण सौण जे आंदा |
पिपलां पीहंगां असी बी पांदे ||
कंडेयां भरोये राह नी हुंदे |
नगेयाँ पैरां आंदे – जांदे ||
प्रेम – नदी जे हुन्दी भरोई |
डुब्बी- डुब्बी रोज नहान्दे||
जे तुसी आणे दा वादा करदे |
रस्ते खडोई उमरां बितांदे ||
नेहरियाँ राती किल्ले नी डरदे |
जे तुसी द्वारे दीया जलांदे ||
चार दिहाड़े जीणा अड़ेयो |
झूठे लारे मत पतियांदे ||
जे तुसी साहड़े सौगी चलदे
अपने मुकदरां प असी इतरांदे ||
यादां च गीत – गजलां लिखे थे |
जे तुसी आंदे गाई सुणान्दे ||
[१२]
जे नी थी निभाणी .......
जे नी थी निभणी तां लाई
किजो थी |
एह जिंद फाह च फसाई किजो
थी ||
नी सच हुंदे सुपने हुण जे
गलानी |
रोज – रोज
सुपनेयाँ आई किजो थी ||
जे नी थे फांग पल्ले मारणे
ई उड़ारां |
तां एह जिंद उड़ारां च पाई
किजो थी ||
जे नी थी करतूत बुझाणे दी
पल्ले |
तां हिकडूए आग्ग लाई किजो
थी ||
जे नी थे लैने झूटे बेई
करी सौगी |
तां प्यारे दी एह पीहंग पाई किजो थी ||
जे नी थी हिम्मत पल्ले
जरणए दी मिहने |
तां सखियाँ ने मेरी गल्ल सुणाई किजो थी ||
जे नी था चलणा सौगी दूर
परदेसा |
तां बसा च चढ़ाणा ई आई किजो
थी ||
जे नी थी टपूंदी लोक लज्जा
री खड्ड |
तां मेरी जिंद मंझाटे
रुढाई किजो थी ||
जे बंजर थी धरती तेरे दिले
दी |
तां इश्के दी बूटी लाई
किजो थी ||
नी थी
करणी गल्लाँ दर्दे दीयां तां |
तां मिस काल मेरे नां दबाई
किजो थी ||
[१३]
कौड़ी सच्ची गलाणी बाबा
.....
कौड़ी सच्ची गलाणी बाबा
|
गल्ल बात मुकाणी बाबा
||
भर सभा च किल्म किल्ले
|
हौणा पाणी - पाणी बाबा ||
घाट्टा बाद्धा अपणा – अपणा |
कस्की हिक्क धुक्खाणी बाबा ||
कदी भला नी चान्ह्दी दिक्खी |
मिट्ठी – मिट्ठी
बाणी बाबा ||
सारे टप्परु मैहल बणी गे |
दिले दी कुथे सुणाणी बाबा ||
[१४]
त्रेऊ .....
त्रेऊ त्रेऊ तैं किजो लाया त्रेऊआ |
सुत्ता संसार जगाया त्रेऊआ ||
अम्बरे बरह्णा अपणी मर्जी |
तैं किजो रौला पाया त्रेऊआ ||
कुसे दे रौणे कोई नी रौंदा |
तैं किजो रौणा लाया त्रेऊआ ||
पंछियाँ तेरा हास्सा पाया |
जाह्लू मता कलाया त्रेऊआ ||
त्रीणी दुनिया मत मंग पाणी |
कुने नी कुसे ई पियाया त्रेऊआ ||
दिक्खी सुणी ने बौयाँ भुइयां |
लोकां जाल बिछाया त्रेऊआ ||
त्रेह कुसे दी कदी नी मुक्की |
एह दुनिया दी माया त्रेऊआ ||
मैं बी त्रीहणा तू बी त्रीहणा |
ताँ इ तेरा दर्द बंडाया त्रेऊआ ||
[१५]
साह्ड़ी फितरत
ज्यादा रौब नी असी सुखांदे |
जे दिल बोल्लै सेई कमांदे ||
लोक्कां ई लग्गै भवें कौड़ा |
फिरि बी मितरो सच ग्लान्दे ||
दुए दीया सुथणी जंघ नी दिन्दे |
अपणिया बत्ता आंदे-जांदे ||
अन्हा कोई मिल्लै रस्ते |
उंगली पकड़ी घरे पुजान्दे ||
प्यार पुगाणा फितरत साहड़ी |
हिक्क दस्सी नी पिट्ठ दसांदे ||
जिस रस्ते बिच्च चिक्कड़ दिस्सै
|
रस्ता छड्डी आप बचान्दे ||
बड्डे सीन्ने बड्डे जिगरे |
नी डरदे नी असी डरान्दे ||
कदी कुसे पुर आस नी रक्खदे |
अपणे कंडे अप्पु चुकान्दे ||
[१६]
हरदम चेत्ता रक्खणा [ कबता ]
सिरे उप्परे पाणी जाहलु बग्गे तां |
कोई जत्न तां करणा पौणा तरणे दा ||
आखर औंदा कम्मे जरेया धरेया दा |
रक्ख हौसला अंदर
जरणे धरणे दा ||
रावण थिया मुकाणा
खेल रचाई थी |
थे सच जाणदे राम
सुन्ने दे हरणे दा ||
कंडे कन्ने कंडा
चुकाणा मितरा सुण |
करंगोरे दा होए
चाए गरणे दा ||
नेत्र त्रिया
जिन्नी खोलेया ज्ञाने दा |
धोई धोई पाणी पी
गुरचरणे दा ||
बाहरे लक्ख सजाओ
टिक्के टारे ने |
नाहस जाणदा सच
गहरे दे सरणे दा ||
इया दुनिया च आणा
आणा नी होया |
हुनर सिक्खदा रिया
जे पेटे ई भरणे दा ||
तोल्लां बोल्लां
जेकर कोई भुल्ले नी |
फिरि मतलब नी ऐ
इत्थे डरणे दा ||
मैन्ह्गा पेईया
साथ दैणा दुर्योधन दा |
वरना कोई तोड़ नेईं
था कर्णे दा ||
सच गलाई माह्णु
कदी गुआणा नी |
हरदम चेत्ता
रक्खणा दर्दा मरणे दा ||
[१७]
नौंये साल
वास्ते .........
गीत
मुहब्बतां दा सब गांदे रहन्न |
हसदे -
बसदे रहन्न गांदे - मुस्कुरान्दे रहन्न ||
हर घर -
परिवार खुशियाँ ने भरेया रैह |
जश्न
जिन्दगी दा सब मनांदे रहन्न ||
कोई पेट नी
भुक्खा रैह इत्थे मितरो |
चूल्हेयाँ
आग्ग बलदी रैह सब खांदे - पकांदे रहन्न ||
सारेयां
फंगां इ मिल्लै उडार उच्ची |
रस्ते
अम्बरां तक सब बणान्दे रहन्न ||
गायै विश्व
सारा मंगलाचार मितरो |
युद्ध -
क्रोध सब भुलान्दे रहन्न ||
कंडे
रस्तेयाँ दे सब रहन्न चुकदे |
फुल्ल
रस्तेयाँ च मिल्ली बिछान्दे रहन्न ||
बद्दल
प्रेम दे सदा रहन्न बरदे |
आग्ग
नफरताँ दी सदा बुझांदे रहन्न ||
मालक दै
सारेयाँ इ नम्रता ते सद्बुद्धि |
बूटे
भाईचारे दे सब लगान्दे रहन्न ||
रैह्न्न
सदा रौंगलियाँ धारां इत्थे |
पंछी डालां
प चुरभुर लांदे रहन्न ||
खाली होई
जायै बाजां छा अम्बर सारा |
पंछी
उच्चियाँ उड़ारां सदा लांदे रहन्न ||
कोई हाक्क
नी कुसे दा खायै इत्थे |
मेहणत करी
ने सब खांदे – खुआंदे रहन्न ||
घरे - घरे
च सुख - शांति दे फुल्ल खिल्लण |
अंगण खुश्बुआं
महकदे – महकांदे रहन्न ||
नौआं साल
रैह सदा भरेया जश्नां |
ढोल
खुशियाँ दे सब बजांदे रहन्न ||
कुसे हक्खी
च नी दिक्खै अथरू दर्द |
बधाईयां
सुखे ने सब दिंदे – दुआन्दे रहन्न
[१८]
सच्चा – सुच्चा बुपार बी सिक्ख
सच्चा-
सुच्चा बुपर बी सिक्ख |
जीणे
दा चजचार बी सिक्ख ||
फुल्लां कन्ने कन्डेयां दे तू |
गले च पाणे हार बी
सिक्ख ||
दुग्गा-खौला जग दरिया एह |
टपणा वार ते पार बी सिक्ख ||
नाहणा खड्डा सेवणा
बड्डा |
स्याणेयां दा एह विचार बी सिक्ख ||
जीवन हट्टी ताँ इ चलणी |
नगदे कन्ने उधार बी सिक्ख ||
ताँ इ मिलणी मंजिल मित्तरा |
टपणी नदियां-घार बी सिक्ख ||
अम्बर छूणे दा जे चा है ताँ |
दैणी उच्ची उडार बी सिक्ख ||
अपणा बजूद बचाणे खातर |
पुरखेयाँ दे संस्कार बी सिक्ख |
[१९]
सुपना
पिया ......
राती
मिन्जो सुपना पिया | ...
मैं
मास्टरी छड्डी ते राजनीती मंझ गिया ||
घरा
– घरा जाई वोट मन्गे |
कुते रोट मंगे कुते नोट मंगे ||
जीतेया इलेक्शन सीना खुशिया ने तणी गिया |
सरकार रा गठन होया मैं मंत्री बणी गिया ||
फिरी मिल्ली झंडी ते लाल बत्ती वाली
कार |
चौक्का – चौक्का लोकां हत्थ जोड़े पे गला फुल्लां रे हार ||
थोड़ा मुस्काणा कन्ने गला लगाणा |
हत्थ जोड़ी करणी नमस्ते ते गांह
जाणा ||
फिरी मैं मंत्री बणी अपणी गल्ला जो
मनवाणा सिक्ख्या |
बिना हास्से हत्थ जोड़ी मुस्काणा सिक्ख्या
||
अग्गे पिच्छे फिरी चमचेयाँ री फौज इ फौज
|
खाणे-पीणे री फिरी मौज इ मौज ||
कुत्थे मोटे चौल टे कुत्थे बासमती खाणी |
कुत्थे घड़ोलुए रा ते कुत्थे फ्रिजां
फिल्टरां रा पाणी ||
मुंगफलिया री जगह हुण काजू बादाम |
चौइं
पास्से बजदी हुण राम सलाम ||
कल जेहड़े मंगदे थिए नमस्ते |
आज्ज हत्थ जोड़ी खड़ून्दे रस्ते ||
कल जेहड़े नां लेई थिए बुलांदे |
आज्ज हर गल्ला जनाब जनाब गलान्दे ||
फिरि
शिमले रे टूर ते स्टेजां रे भाषण |
झूठे –
सच्चे बादे ते मिट्ठे – मिट्ठे आश्वासन ||
मैं मंत्री बणणे रा फिरि पूरा फैदा उठाया |
पुट्टया पुराणा टपरू नौआं फ़्लैट बणाया
||
पी
डब्ल्यू डी रे सहबा जो बुलाया |
दस्सां बारहां दिनां रोड़ अंगणा तक पूजाया ||
कर्जा लिया ते पुत्र ट्रांसपोटर बणाया |
इक
टाटा सूमो ते इक ट्रक पाया ||
हूण लाड़ी बी खूब प्यारा कन्ने चाहणा लग्गी |
हर
टूरा पर शिमले सौगी जाणा लग्गी ||
सरकारा रा पैसा अपणी तिजोरी च पुजाया |
अपणेयां खास चम्चेयां जो खूब फैदा पुजाया
||
कुसे री बदली करी घरा पुजाया |
कुसे जो पांगिये रा जोत लंघाया ||
अपणे रिश्तेदारां जो पिच्छले दरवाजे का बुलाया |
कुसे जो नौकरी कुसे जो एजेंसी कुसे जो ठेकेदार बणाया ||
अपणे रिश्तेदारां ते चम्चेयाँ च अपणा नां चमकाया |
किट्ठे
करी इनां जो जिंदाबाद दा नारा लगवाया ||
पञ्ज साल पंजां दिनां साई बीत्ती गे इक दिन आया |
विधान सभा भंग होई मिन्जो घरा पुजाया ||
पार्टिये मिन्जो कन्ने दगा कमाया |
मेरे हलके रा टिकट कुसी होरसी जो थमाया ||
मैं हाई कमाना जो बताया मैं भुक्ख हड़ताला पर बैणा |
इस अन्याय तांई मैं आग्ग दाह लेई
लैणा ||
चीफ हाई कमाना ने मिन्जो समझाया |
मत कर पंगे तैं मत कमाया ||
बेई जा चुपचाप होरसी जो बी खाणा दे |
एह है मेरा रिश्तेदार इस जो बी कमाणा दे ||
पर मैं नी मन्या अपणे चम्चेयां जो बुलाया |
विरोध दिखाणे ताईं पार्टी रे दफ्तरा जाई धरणा लगाया ||
इतणे मंझ मेरी घरेवालिए मिन्जो
जोरा ने हिलाया |
दर्द जी उट्ठी जाओ चाह पियो
दिन चढ़णेजो आया ||
अशोक
दर्द
२८-२-२०००
[२०]
हमारा
चंबा
सुंदर छैल हमारा
चंबा |
लगदा बड़ा प्यारा
चंबा ||
सैलड़ीयां धारां ठंडियाँ फुहारां |
कुदरत छैल नजारा
चंबा ||
पधारे मैदानां
गोदा लेई |
बस्दा उच्चियाँ धारां चंबा ||
चुरभुर चुरभुर
पंछी लांदे |
गांदे छैल प्यारा
चंबा ||
रंग बरंगे फुलणु
फुलदे |
भरेया चील दयारां
चंबा ||
बन्नी बणागेई भलेई
भरमाणी |
चौण्डी दी हक्खी
दा तारा चंबा ||
सतरंगे मौसम अंगणे
सद्दी |
लैंदा मौज बहारां
चंबा ||
रावी गोदा लेई
खेह्लांदी |
जियां राजदुलारा
चंबा ||
पीर पन्जाले चांदी
बरदी |
नहान्दा ठंडियाँ
फुहारां चंबा ||
रंग बरंगे मौसम ओढी
|
बदलै नित नुहारां
चंबा ||
गीत संगीत कला
दियां दिक्खो |
भरदा उच्चियाँ
उडारां चंबा ||
युग युग जिये
साहिल वर्मा |
चंपा दिया नुहारा
चंबा ||
हसदा बसदा रैह
हमेशा |
हारां धारां
बजारां चंबा ||
[२१]
प्यारुआ शराब छड्डी दे [ गीत ]
अड़या छंदे तेरे पैरां हत्थ लांदी
प्यारुआ शराब छड्डी दे ...||
लोक तिज्जो बोलदे सराबड़ा सराबड़ा |
मिंजो सुणी सुणी शरमा आंदी ..|| प्यारुआ शराब
छड्डी दे ...|||
इस शराबे मोया केई घर पुट्टीते |
रस्तेयां चलेदे कुरस्तेयां सुट्टीते |
हत्थ जोड़ी जोड़ी तिजो समझान्दी | प्यारुआ शराब
छड्डी दे ..||
इस शराबे केई घर उजाड़ीते |
इयां उजाड़े जियां हवा अम्ब राड़ीते |
पर तिजो जरा समझ नी आंदी |प्यारुआ शराब छड्डी
दे ...||
अड्डेयां प पी करी मारदा तू बुड़कां |
मैं घरे राशणे दे खाली टीन ठुड़कां ||
मैं इ जाणा कियां डंग मैं टपान्दी | प्यारुआ
शराब छड्डी दे ||
धक्के खांदा लोकां जो तू रस्ते च सुझदा |
अधि अधि राती मोया घरे तू ए पुजदा ||
घड़ी दिक्खी दिक्खी रात मैं बितांदी | प्यारुआ
शराब छड्डी दे ...||
पूरे शराबियां दे कदी बी नी पौंदे |
धन – मान सारा फुक्की दिक्खे पिच्छे रौंदे |
ताईयों हत्थ जोड़ी तिज्जो समझान्दी || प्यारुआ
शराब छड्डी दे ...||
छड्डी दे शराब मोया रस्ते प आ तू |
कले दी सोच घर अपणा बसा तू |
हत्थ जोड़ी जोड़ी तिज्जो समझांदी | प्यारुआ शराब छड्डी दे ...||
मेरे बी ने चा मोया मत अग्ग ला तू |
बोतल जो छड्ड दिल मेरे कन्ने ला तू ||
करां मिणतां ते तरले पांदी ||
प्यारुआ शराब छड्डी दे ...||
[२२]
कुस ने दिले दी
गल्ल सुणाणी
कोई राजा कोई राणी
|
कुसने दिले दी
गल्ल सुणाणी ||
ढाहण खाइया
सारियां सीन्खां |
पांदी बचेया
माह्णी माह्णी ||
कुण दिक्खे इत्थे
हक्खी खोल्ली |
मैं बी काणा तू बी
काणी ||
जेह्ड़ा छाणदा ओ इ
जाणदा |
परखी लै तू छाणी
छाणी ||
नौंए रस्ते पखले
माह्णु |
ठगदे मत तुस जाणी
जाणी ||
अपणा आप बचाया कर
|
जित्थे जीभा
मिट्ठी बाणी ||
दर्द गलान्दा
मुड़णा सौक्खा |
रस्ते भुल्ले उम्र
न्याणी ||
[२३]
तेरयां हत्थां इस देसे दा कल जवना ए
कन्न खोली ने सुण तू मेरी गल्ल जवाना ए |
तेरयां हत्थां इस देसे दा कल जवाना ए ||
तू देसे दी अणमुल्ल पूंजी देस बी तेरा ए
|
टेढयां –मेढयां रस्तेयां तू मत लांदा
डेरा ए ||
सिध्यां सिध्यां रस्तेयाँ बिच्च तू चल
जवाना ए || तेरयां ...||
भंग तम्बाकू गुटके जर्दे मुंह मत लांदा ए
|
गन्देयां नालुआं डुब्बी ने मत जिन्द
गवान्दा ए ||
बुरे कम्मे दा खरा नी मिलदा फल जवाना ए
|| तेरयां ....||
केईयां दी मत मारी पाया घरां उजाड़ा ए |
नशेयां भाइयां भाइयां बिच्च बी पाया
बगाड़ा ए ||
अपनेयाँ हत्थां लिखी संदेशे घल जवाना ए
|| तेरयां ...||
वैर वरोध ते नफरत दी अग्ग रियां बुझान्दा
तू |
बुट्टे प्रेम प्यार दे म्हेशा रियां
लांदा तू ||
मत करदा कदी देसे कन्ने छल जवाना ए ||
तेरयां ...||
जेकर ज्ञान विज्ञान दे अंदर करणी तरक्की
ए |
हरदम खुल्लियाँ
रक्खयां जवाना अपणीयां ह्क्खी ए |
देस निगाह च
रक्खयां तू हर पल जवाना ए || तेरयां ...||
बैरियां दे उकसावे
ने तू राह मत भुलदा ए |
अपणा मान गुआई
गैलियां गैलियां रुल्दा ए ||
खाद्दा दा ए देसे
दा तैं अन्न जल जवाना ए || तेरयां ...||
देस प्रेम छा
बड्डा नी कोई धर्म जवाना ए |
देस सेवा छा बड्डा
नी कोई कर्म जवाना ए ||
देस सेवा करी करी
लै जीवन सफल जवाना ए ||तेरयां ...||
[२४]
भरणा पौणा हर्जाना ....
भरणा पौणा हर्जाना इक्क दिन झूठ गलाणे दा
|
फल भोगणा पौणा मितरा बुरा कमाणे दा ||
गंगा गी बत्त सारे दसदे बणी सयाणे ने |
कोईनी खर्चा दिंदा इत्थे आणे जाणे दा ||
अपणिया लग्गिया दी इन्हां ने गल्ल मत
लांदा तू |
हुनर जाणदे एह अट्टे दियां चिड़ियां उड़ाणे
दा ||
हवा सौगी पुणदे मते खुद्दारी बेचीं ने |
एह बी कोई हुनर नी मितरा टैम टपाणे दा ||
नौइयां पौंगरां फुक्की जेह्ड़े मौजां
लुट्टा दे |
कोई फ़ायदा नी इदेया धन कमाणे दा ||
बेशक चिकड़े वाले नालू थां थां बग्गादे |
हुनर सिखदेयां रैह्णा इत्थे आप बचाणे दा
||
नेहर म्नेहरे नी जाणा उल्लुआं दिया
पन्चिया च |
निम्बली पिच्छ प्रगड़े पीणी अर्थ गलाणे दा
||
अपणा आप बचांदे रैहणा दर्द गलान्दा ऐ |
हुनर जाणदी दुनिया इत्थे जाळ बिछाणे दा
||
मैं कविये दी लाड़ी
मैं कविये दी लाड़ी अड़यो मैं कविये दी
लाड़ी |
पल - पल गिणी ने कटदी राती पल - पल गिणी
दिहाड़ी ||
अंगणे खड़ोई पागलां साई वारे – पारे
दिक्खदा |
कलम - डैरियां लेई रैह्न्दा किच्छ नी
किच्छ बस लिक्खदा ||
बणी - ठणी जे नेड़े खड़ोआं दिक्खदा नजरां
फाड़ी |
मैं कविये दी लाड़ी अड़यो मैं कविये दी
लाड़ी |
घरे - बणे दा फ़िक्र नी कोई मस्त गुजरां
दा झोट्टा |
लोक गलांदे वाह - वाह दर्दा मैं गलानी खोट्टा
||
दिने दुपहरी सुत्ता रैह्न्दा मारी खूब
घुराड़ी |
मैं कविये दी लाड़ी अड़यो मैं कविये दी
लाड़ी
मंगदी - मंगदी बुड्ढी होई नी मने दी होई
पूरी |
रज्जी नी खाया रज्जी नी लाया रेई आस
अधूरी ||
सारी उमरा सुक्की धुप्पा मेरी रीझां दी
बाड़ी
मैं कविये दी लाड़ी अड़यो मैं कविये दी
लाड़ी
रोज चुड़ेलां फोन करदियाँ हस्सी - हस्सी
गल्लां लांदे |
केई कवितां फोने पुर ई घंटा - घंटा
सुणांदे ||
हंडदी - चलदी मैं भी सुणदी रक्खदी हिकड़ु
साड़ी |
मैं कविये दी लाड़ी अड़यो मैं कविये दी
लाड़ी ||
चा नबाबां आले इसदे नी पैसे चार बचान्दा
|
दस तरीका तक पुज्जदे - पुज्जदे बणी गरीबु
जांदा ||
कुस्स ने घरे दी गल्ल सुणाणी मेरी हालत
माड़ी
मैं कविये दी लाड़ी अड़यो मैं कविये दी
लाड़ी ||
मेरे अग्गे शेर दहाड़ै लोकां अग्गे बिल्ला
|
झुठियाँ बड़कां झूठे लारे खसम इदेया
मिल्ला ||
घरे मारदा बड़ी अंग्रेजी बाहर बोल्दा
पहाड़ी |
मैं कविये दी लाड़ी अड़यो मैं कविये डी
लाड़ी |
औक्खी - सौक्खी धक्का करदी मैं जिन्दगी दी गड्डी |
धुक्खी - धुक्खी ने गेई फकोई निकली हड्डी - हड्डी ||
इसदे अग्गे पेस नी कोई थी तां मैं बी
मुराड़ी |
मैं कविये दी लाड़ी अड़यो मैं कविये डी
लाड़ी |
रोज संझा ई वादे करदा मुकरी भ्यागा जांदा
|
नेतेयां आले चाले इसदे लारे - लप्पे
लांदा ||
नी बोलादी झूठ मैं अड़यो खांदी कसम तुहाड़ी
|
मैं कविये दी लाड़ी अड़यो , मैं कविये डी
लाड़ी ||
जिस बेले बी दिक्खो रैह्न्दा बिच्च
कताबां बड़या |
गल्ल मेरी ता सुणदा नी बस बजान्दा अपणा
मढ़ेया ||
दिल दे अंदर दर्द है कितणा कुस्स ने
दस्सां उघाड़ी |
मैं कविये दी लाड़ी अड़यो मैं कविये दी
लाड़ी ||
गीत ...
लोक लैंदे नां रब्ब दा वे मैं तेरा लैंदी
हां |
इश्क खुदा दे दर ते तिज्जो रब्ब रब्ब
कैह्न्दी हां ||
हीर ते लैला वर्गी मैं बी आशक सच्ची हां
|
दुनिया दे दस्तूरां ताईं मैं भवें कच्ची
हां ||
कसम खुदा दी करदी वे मैं सच सच कैन्ह्दी
हां ||
रैह्न्दी दूरियां तकदी हरदम इश्क उडार
दियां |
जिन्द नमाणी जो लाइ ने फंगां प्यार दियां
||
मीरा बणी ने जाणे मैं के के सैह्न्दी हां ||
भवें गलांदे इश्क दा सागर बड़ा इ गैहरा ए |
चौंई पास्से उसदे उप्पर लग्गेया पैहरा ए
||
इश्क समन्दर बिच्च मैं बणी ने मच्छली
रैह्न्दी हां ||
हुस्न इश्क दी सदियाँ चलदी आई कहाणी ए |
भौंर कलि दा राजा कली भौंरे दी राणी ए ||
मैं तेरे प्यार दे मैह्लां बणी ने राणी
बैह्न्दी हां |
अशोक दर्द
